الخميس، 27 يناير، 2011

اللي هيقول البرادعي تاني .. يستاهل الضرب بال...........

              فات يوم 25 يوم الغضب يوم كنت من اسعدالناس فيه بجد 
  واكييييد طبعآمش لوحدي كان فيه ناس كتيييييييير أوي مبسوطة ومش مصدقه نفسها
           اللي حصل محصلش من سنييييين عديدة اللي حصل عمل صدي جامد
    وهز عروش وصحي ناس من غفلتها ..ربنايرحم الشهداء اللي فقدناهم برصاص  
 الحكومة ...الشهداء اللي نزلوابعدماأتحرروا من الخوف واتحرروا من الرعب من بعبع
                               اسمه  الحكومة والأمن   
                                   
   عايزة بجد أقول حاجة لحبايب ومؤيدي البرادعي ...كان فين
      يامصفقين ومهللين الخواجة "بردع "في يوم الغضب
 واسمع بقي كمان أحلي تصريح ليه بجد نكته خااااااااااااااااالث
    عندماتم سؤاله عن يوم 25 ينايروماقام به شبابناأبو دم حر 
 فقد قال/  
            البرادعى يقول أنه لم يرغب فى المشاركة في إحتجاجات الأمس
                        حتي لايخطف الأضواء من الشباب         
     بجد بجد سلام لأبوقلب كبيييييييرياجماعة سلام للي عدد كبيرقرروا وأختاروا
             أن البرادعي يكون رئيسناالقادم وده طبعآفي حاله واحده بس
  أن كل الشعب ينزل الشارع ويتظاهرويهتف ويهرب فرعون ونجري علي القصر
 نمسح الكرسي بهدومنا ونسلمه ليه .......علي فكرة والله العظيم أنالابكره الراجل ولا
 حاجة بس كل الحكاية أنه فعلآ ...مينفعش لا هوسياسي ولاحاسس بالشعب ولاحاسس 
 أصلآ ايه هي مشاكلنااللي بنعاني منها عشان تختاروه ...عايزه أعرف علي أي أساس 
 بتختاروا ...وأيه هي مقاييس الأختيار .....خللي بالكواياجماعة أحنامش بنختارفساتين 
ولا أكل ولاعربية                     
                                              
            
                               بنختاااااااااااااار    
                             رئيييسسسس                                                 
   وعشان بنختاررئيس يبقي لازم نختارصح ونحدد قبل أي ثورة أوغيره أحناعايزين
مين يحكمنا شايفين مين يقدريحقق لنامطالبنامين لمانقوله شعبك جعان والشباب عاطل
   وفي عنوسة وفقرومرض هيستجيب لينامش يضربنابالرصاص المطاط ويعتقلنا
  أويسيبناويسافرومنشوفش وشه غيرفي المناسبات أحنابجد مشتتين عايزين نحدد هدفنا
          ونشوف نبتدي منين صح ومين اللي نختاره عشان يبتدي معانا
    ياتري عندكوا ردود ولاجزء هينزل تاني يوم الجمعة والباقي يتفرج وخلصت

الثلاثاء، 25 يناير، 2011

يوم الغضب يوم الشرفاء

   بحيي كل أصدقائي وزملائي المدونين وغيرهم بحيي كل واحد راجل, ست, بنت 
     ولد حتي الأطفال اللي أهلهم أخدوهم معاهم عشان يزرعوافيهم روح الحرية   
 


                  عشان أنت مصري لازم تخرج وتثور وتقول لأ       
                   لحد دلوقتي حصيلة المتظاهرين 3 المؤكد منهم 
   الشهيد "مصطفي رضاعبدالفتاح"   "20 سنة " رحمه الله توفي أثراصابته بطلق
        ناري ونقل لمستشفي السويس وتوفي ايضآ"سليمان صابرعلي 31 سنة
         ومجند شرطة رحمهم الله جميعآنريدهاسلمية ويريدوها حربية مأساويه 
                                

               علي فكرة  لازم ننزل ...نزولناهيغير نزولنا هيرجع لينا حاجات كتير
         مش يوم 25 بس كل يوم كل وقت كل ساعة ...لازم نقول  لا    للظلم   
   في أصدقاء كتيربينصحوني أكبردماغي أوعلي الأقل أخاف علي نفسي شويه وأسكت
     شوية بس بجد لا أناهسكت ولا هابطل أشارك ولاهيأس الا لمايتغير الوضع  
      بدعي ربنابس أن صحابي وزمايلي يرجعوا بالسلامة ومش يحصل لهم حاجة  
                     ربناكريم ومصرغالية ومش بتحرر غيربالدم  
       المهم نشارك واللي مش يقدر يشارك يمدبأي شيء سواء طعام أوغيره  
                                        
                                                       

                    

الأربعاء، 19 يناير، 2011

ثقافة أولع في نفسي ...!

                                عبده عبدالمنعم أشعل النارفي نفسه أمام مجلس الشعب   
      
              الحقيقة لم أكن افكر في الكتابة عن هذاالموضوع أوعن المواطن ومافعله
        بنفسه ليس بالأخرين وأكرربنفسه لأنه في الواقع ألحق الضرربنفسه فقط .

        ثورة تونس وتحريرها أشعل الشاب التونسي محمد بوعزيزي النار في نفسه متسببا                 في احتجاجات شعبية أدت إلى إسقاط الرئيس زين العابدين بن علي

 

         وبالأمس حدثت خمس محاولات للأنتحار أمام مجلس السلب أيضآ وفي أماكن 
   أخري حيث قام  ميكانيكي تبريد بالإسماعيلية بإشعال النار في نفسه مساء نفس اليوم، قبل أن يشعل شاب النار في نفسه بالإسكندرية صباح الثلاثاء بسبب بطالته وسوء أحوال  المعيشة وتوفي متأثرا بالحروق، فيما أشعل المحامي/محمدفاروق النار في نفسه أمام مجلس الشعب صباح نفس اليوم، وتمكن الأمن من منع شخص خامس من إشعال النار في نفسه أمام مجلس الشعب، ليأتي موظف شركة مصر للطيران ليصبح سادس مواطن مصري يشعل أو يحاول إشعال النار في نفسه في أقل من يومين 
          بجد بجد داكتير وغلط جدآ أنابنقلد وياريتنابنقلد فعل أوتصرف أيجابي 
      أعترض أتظاهر أعتصم أشتم قل ادبك لكن مفيش أي حاجة في الدنيا ممكن توصلك لأنك تسكب علي نفسك بنزين وعودكبريت وياللا  لالالالالاااااااااااااااااااااا 
 الحكومة مش هتنفعك ولاهتفكرحتي أنت عملت كده ليه دامش أنذارليهم ولاحاجة   
 صدقوني اللي يفكركده يبقي غلطان الشاب التونسي "محمدبوعزيزي "حرق نفسه 
ولاكان في باله أنه هيحصل كل ده ولاحتي شهداللي حصل لأنه توفي الله يرحمه 
 لكن أنسي مفيش حدفي مصر هيعمل زي ماعمل شعب تونس أحنااضعاف أضعافهم 
    بس مش هنعمل عشان الضعف أتمكن منناسكن جوانابقينابنستنشقه زي الهوا  
                       هوا الذل والهوان هوامسمم هواالضاليين 
        أحنالازم نعترض ونرفض وناخدحقنابس مش بحرق نفسناياجماعة 
 الناس اللي أقدمواعلي الأنتحاربحرق نفسهم كانت مطالبهم مطالب خاصة شخصية 
مش أعتراض علي الوضع العام السيء المهين الناس دي هانت عليهانفسهايبقي مش هتهون علي حكومة " اقتل نفسك بنفسك" أرحمونابقي حتي الأعتراض شخصي ومش
            عارفين تنفذوه الله يخرب بيت الحكومة اللي خربت البيوت
            
            فاكرين نفسكوا هتصعبواعلي حد ..دول مش بعيد يصرفولكوا
           البنزين والكبريت هدية ولوأن البنزين غالي بس مش خسارة
               فيكوا مادمتواهتريحواالحكومة منكواومن طلباتكوا للأبد

                           

الجمعة، 14 يناير، 2011

تصريح مواطن ميت

                           


           صرح مواطن مجهول                       في أحدالعشش بالقبور
              بأنه قداخذ حقه                        من الفقروالجوع والخضوع
            وبدأيحكي الحكايه                           لناس مجهولين زيه
         كان بيحكي عن ضحايا                       هومنهم وملايين زيه
         أل في يوم تعب شويه                           خدوه ولاد الحلال
          ودوه علي مستشفي                           وسابوه في الاستقبال
         وبعدشويه جاله دكتور                          مالك ياعم المجهول
       تعبان..يابني ومش قادر                       وحاسس أن قلبي مابيدور
         وطلع كده سماعه                              وعراني أدام الجماعه 
      وقلب فيه شمال ولمين                         وقاللي عندك زايده يامسكين
      طيب يابني ماتعملهالي                               ينوبك فيه ثواب
     دنافي رقبتي كوم عيال                             وحاجات والله ماتنقال
       طيب استني شويه                            هو أنامش هخلص في الليله ديه
      وآخرتهايعني باخدايه                                ياألف حسره ع المهيه
  معلش يابني عشان خاطري                              يعني هي جت عليه
       وهنا جت الحكيمه                                  قالت لي/ياعم بقولك ايه
       روح وردللخزينه                                     حوالي 250  جنيه
   صرخت وقولت ليه ياست                                 ايه..بتقولي ايه
     دناعايش في الأرافه                                  ومش لاقي حتي الجنيه
   ودي مستشفي "حكومه"                            مش دي حكومه برضه ولا أيه
    بقولك متضيعش وقتي                                  في ناس غيرك تعبانه
  ودي مبئتش "حكومه"                                باعوها وبئت استثماري كمان
   وخد الراجل الكلمتين                                    في جنابه ياعيني  وأاام..!
      الكلام اللي سمعه                                        وجع جنابه أكتركمان
 ودموعه نازله علي خده                                بيصرخ يابلدي عليكي السلام
 مبأش فيكي مكان للفقرا                                         سواء سليم أوعيان     

دا أول بوست نشرته تقريبآمن حوالي 10شهورو جاني عليه7 كومنتس مش كان لسه في أي وجودلمدونتي ولاحديعرفهاأصلآ
قررت أنشره تاني بعد قراروزيرالصحة بتحويل المستشفيات الحكومية الي خاصة وتحميل المواطن جميع نفقات العلاج حتي الهوا
اللي هيتنفسه داخل المستشفي هيدفع تمنه يعني هيدفع تمنه .