الخميس، 27 مايو 2010

وركبت المركب

    زءوني وركبت المركب                          أل بيسؤهاوطني ديمقراطي
     حطيت أنا رجلي فيها                             وأنا خايف ومش راضي
    ومشيت بينا المركب                                    شويه والبحرهادي 
     وبعدين وقفت بينا                                    جري لها ايه السفينه 
 بسأل وأنا ماشي في وسط الناس                    بيردوا بأي كلام وخلاص 
  مش عارف ... مش فاهمين                          ولا ... مش عارفين 
      هي وقفت بينا ليه                                    ولاوقفت بينا فين  
    المهم ... وقفت مكاني                                 وقلت ياخبر بفلوس
وعيني جت علي حد واقف                            شكله مخنوق بالفلوس
   لبسه غيرلبس الناس                               وشكله غير شكل الناس
مع انه يا أخي واحد منهم                           بس مكانته عملت له أساس
  جريت بسرعه عليه                                   مساء الفل ..... يابيه
   عندي ليك سؤال                                      هي السفينه وقفت ليه ؟
قاللي /ماتخفش يابني                                     دلوقتي الريح تعدي
والسفينه اكيد هتمشي                                   وعلي برالأمان هترسي
رحت وأعدت مكاني                                      وأنا واثق من كلامه
ما هو ربان السفينه                                        وهو اللي ماشي بينا
 وجه الليل علينا                                         ونمت علي أننا مشينا
وصحيت بعد سنين                                       لاقيت الناس جعانين
تعبانين مش لاقيين                                        شط ولا مرسي لينا
وقالولي/ أيه صحاك؟                                      دا النوم أرحم كتير
والموت رحمه كبيره                                    مش عارفينها ناس كتير
قمت وجريت ع الريس                                 السفينه مالها ياريس؟
                               
قاللي / يا ولد روح هيص                                في الفقر ياأما تلخص
  البحر يابني أدامك                                   والمرسي دا بس في أحلامك
وقاللي ..أوعي تجيني تاني                             يا أما البحر هيبقي مكاني
 هيرموني ...ويغطسوني                              ويقولوا لأهلي مكنش معانا
 والبحر هيشهد معاهم                                       اني مكنتش معاهم 
  مع أني كنت معاهم                                     وبالغصب خدوني وياهم 
مش عارف أعمل ايه                                         كلامه أتغير ليه ..؟ 
  وشكله اتبدل ليه..؟                                       خلاص هسكت يا بيه
سامحوني غصب عني وافقت                        أصل الفقر أنا خدت عليه
   أما البحر دا مش مكاني                           ولا المرسي الأ نفسي ألاقيه 
           

الثلاثاء، 25 مايو 2010

"حمزاوي"... معبود الفرافير


رأفة بي وبزوارمدونتي الكرام قررت أن نخرج شويه من جو الفول والمعتقل وغيره وندخل علي حاجه تانيه "طريه شويه" طبعآ شفتوا أعلان ميلودي الجديدوأكيد شفتوا"حمزاوي" ومن يكون الأخ "حمزاوي" حدمنكم شافه قبل كده في أعلان أوقناه أو مكان..طبعآلاء.. فبعدسيل الاعلانات الخاصه بشخصية "وديع"آريال.."محدش يفهمني صح لاني نيتي سليمه وطبعآ عشان يظبط الأرسال علي ميلودي وكل مواطن زي مابياخد حقه في العيش والسكر واللحمه "الله يمسيهابالخير" ياخد المواطن حقه كمان في رؤيه "المزز" عشان تتحقق لأول مره علي ايدين البطل وديع  العدالة الأجتماعيه والمساواه في التوزيع وايضآ مبدأ "مزه لكل مواطن" خاصة "المزز" اللي كانت بتيجي مع "ودعدع" . . نرجع بقي ل "حمزاوي" اللي واقعه فيه البنات خاصة في عينيه اللي بتسرب اشعاع نووي مسيل للأنف"محدش يسأل يعني أزاي" لاني مش عارفه.. المهم"حمزاوي" معبود الفرافيرالطاقين الروشين اللي مسئطين البنطلون جامد أخرحاجه خالص بشعارهم"علي أد ما تقدرسئط بنطلونك...بلدناديمقراطيه مين هيلومك...أنت مش حرتقول رأيك... بس أن شاالله تقلع هدومك" لامم البنات حواليه وكمان "نيكول" بتتحايل عليه وهوبيرفض أسم الله عليه ياتري ياننوس بترفض ليه ..وأخيرآ أقولك رأيي بصراحه " جتكوا نيله مليتوا البلد".

السبت، 22 مايو 2010

أحنا زهقنا من الفول

     أستني متقولش انت                          انا المره دي اللي هقول
وكلامي عني وعن الغلابه                    مش عن وزيرولامسئول
   أحنا زهئنا من الفول                           أحنا زهئنا من الفول 
 أي نعم بيدينا power                      ومصبرنا علي فراق اللحمه
والفراخ المحظوره                           اللي بتعطس مي الأنفلونزا
لكن أحنا برضه بني آدمين                   وزهئنا...يارب الرحمه
مبنطلبهاش من عبادك                         اللي نسيونا في الزحمه
بنطلبها منك يارب                                قادرتسخرلنا اللحمه
وتقرب البعيد                                     وتزورنامره في الحله
بس نحس أنها موجوده                         ونشوفهافي السنه مره
حتي لو مش مقصوده                         مش بس عندالجزار بره
  دامش كلامي أنا                              داكلام ناس غلابه كتير 
كلام ناس تعبوا وشقيوا                      ومي الهم طفح بيهم الكيل 
وبرضه من سوء حظهم                     في ناس معندهاش ضمير
بيبعوالهم لحمه مستورده                       وهي آصلا لحم حمير

السبت، 8 مايو 2010

والله بريء يابيه...

             والله بريء يابيه                                                                    والله مظلوم  بجد
            وكل اللي عملته                                                                        قلت كلمة حق
            وملحئتش ياخويا                                                              بعيدعنك ع اللي حصل لي 
            مشفتش أدام عينيه                                                               ولاحتي الهوابيوصللي
             بس كنت بشوف                                                                أشباح وبيكلمواكده زينا
           بس كلامهم كله كا ن                                                              عن الديمقراطيه عندنا
        بس كان الوجع في جسمي                                                        وسمعت كده طراطيش كلام 

        اني لومسمعتش كلامهم                                                           هبئي اخوانجي يامفجرألغام
            مع اني اناراجل غلبان                                                            وكتيرمن غيرعشابنام
           بس ساكت هعمل ايه                                                         ماهومش لوحدي انا اللي جعان 
        وكنت معدي جنب المظاهره                                                     ورفعت ايدي...خدوني أوام
            مع اني والله ماأعرف                                                            كان علي ايه حتي الكلام
           كان علي رغيف العيش                                                            ولاعلي مرتب مفيش
            ولاعلي اللحمه الاغاليه                                                             وف بيتي منهامفيش
            المهم خدوني علي سهو ه                                                          ورتبوالي هما الداهيه
             وقالوالي أختاريامختار                                                           تخليك في جهنم والاالنار
            قلت له:ياباشا..أسمح لي                                                        ياريت أبواب النارتفتح لي 
               واوعدك لوخرجت                                                                    جوه الحيط أناهمشي

الخميس، 6 مايو 2010

تصريح مواطن ميت

      صرح مواطن مجهول            في أحدالعشش بالقبور
        بأنه قداخذ حقه              من الفقروالجوع والخضوع
      وبدأيحكي الحكايه                 لناس مجهولين زيه
    كان بيحكي عن ضحايا             هومنهم وملايين زيه
    أل في يوم تعب شويه                خدوه ولاد الحلال
    ودوه علي مستشفي                 وسابوه في الاستقبال
  وبعدشويه جاله دكتور                 مالك ياعم المجهول
 تعبان..يابني ومش قادر             وحاسس أن قلبي مابيدور
   وطلع كده سماعه                  وعراني أدام الجماعه 
وقلب فيه شمال ولمين              وقاللي عندك زايده يامسكين
طيب يابني ماتعملهالي                   ينوبك فيه ثواب
دنافي رقبتي كوم عيال                وحاجات والله ماتنقال
 طيب استني شويه                هو أنامش هخلص في الليله ديه
 وآخرتهايعني باخدايه                   ياألف حسره ع المهيه
معلش يابني عشان خاطري              يعني هي جت عليه
 وهنا جت الحكيمه                    قالت لي/ياعم بقولك ايه
 روح وردللخزينه                      حوالي 250  جنيه
صرخت وقولت ليه ياست                ايه..بتقولي ايه
  دناعايش في الأرافه                  ومش لاقي حتي الجنيه
 ودي مستشفي "حكومه"          مش دي حكومه برضه ولا أيه
 بقولك متضيعش وقتي                في ناس غيرك تعبانه
 ودي مبئتش "حكومه"            باعوها وبئت استثماري كمان
  وخد الراجل الكلمتين               في جنابه ياعيني  وأاام..!
 الكلام اللي سمعه                     وجع جنابه أكتركمان
 ودموعه نازله علي خده         بيصرخ يابلدي عليكي السلام 
 مبأش فيكي مكان للفقرا                سواء سليم أوعيان     



دا أول بوست نشرته تقريبآمن حوالي 10شهوروالكومنتات دي جاتني عليه مش كان لسه في أي وجودلمدونتي ولاحديعرفهاأصلآ
قررت أنشره تاني بعد قراروزيرالصحة بتحويل المستشفيات الحكومية الي خاصة وتحميل المواطن جميع نفقات العلاج حتي الهوا
اللي هيتنفسه داخل المستشفي هيدفع تمنه يعني هيدفع تمنه .
             

السبت، 1 مايو 2010

من أجل"أفاك"أنت.

بما ان "أفا" الانسان في مصر اكثر اجزاء الجسم أنتهاكآ وذلك بالطبع يعكس مدي تطبيق الديمقراطيه والشفافيه في اروع صورهماسأقدم النصائح الذهبيه لحماية حقوق "افاك"من الانتهاك اولا/تبعد بعدآ تامآعن المظاهرات والوقفات الاحتجاجيه ايآكان سببها بداية من احتجاجك علي ندرة وجود رغيف العيش أبوخمس قروش بتاع الفقرا اللي بئوا ماليين البلد ونهاية بأعتراضك علي تغير وتعديل بعض المواد في الدستور التي أصبحت اصعب من مواد الثانويه العامه بكثيرفهي من المواد التعجيزيه التي تعدم حق ترشيحك كمواطن مصري لرئاسه بلدك .أما....ثانيآ/فأياك ...أياك...ان تأخذك الحماسه وتذهب لادلاء صوتك في الانتخابات خاصة لو كنت هتصوت بصدق وعلي حق ربنا ساعتها مقولكش بئي "لن يرحم أفاك"لفعلتك الشنعاء يا عميل .وأخيرآ نصيحه يتبعهاالكثيرمن المواطنين الان ويقوموا   بتطبيقها علي أكمل وجه وهي اذا وجدت رصيف فاضي من الباعه الجائلين الغلابه والمتسولين وأصحاب السيارات اللي خلوا الرصيف الرصيف بتاع الناس "باركينج" اذا وجدته فانصح أن لاتمشي فيه بل أمشي جوه الحيط وايضآ لاتتكلم فأن للحيطان أذان ....وللحيتان اسنان وما عليك فعله الان أن تدلي بصوتك في هذا الاستفتاء هل تشعربالديمقرا طيه ومدي     تحقيقها  علي "أفا" المواطن .                     نعم (  )               لا (    )