الأربعاء، 20 أبريل 2011

تحبها إيه " إسلامية ولا سلفية ولاوعلمانية ولامدنية ولاملوخية ولا بالكاتشب " ؟؟

تحبها إيه " إسلامية ولا سلفية ولاوعلمانية ولامدنية ولاملوخية ولا بالكاتشب " ؟؟!!  
سؤال بسيط جدآ في ناس عارفه إجابته من أول نظرة ....أنا في البوست ده مش عايزة أتكلم 
بس يهمني أوي أعرف الناس عايزة أيه 
      عايزين مصر تبقي دولة إيه ؟؟؟؟ 
     وليه ؟؟ يعني ليه اسلامية وليه سلفية وليه علمانية وليه مدنية 
      أنا شايفة اليومين دول كل واحد بقي يعمل حزب والسلفيين اللي كانوا بيعتبروا الأحزاب
    من المحرمات وكذلك الترشح للمجالس النيابية ...بيأسسوا حزب دلوقتي ايه اللي أتغير 
   وقلب الموازين وخللي الحرام حلال بعد25 يناير ماتفهمونا 
   جماعة الجهاد الإسلامية بتعمل حزب أهلآ وسهلآ من ايه ده يعني وليه 
   نجيب ساويرس عمل حزب "المصريين الأحرار "  
   نجيب جبرائيل أسس حزب "الأتحاد المصري " 
  بصراحة أنامش بسأل أمتي ومين هيقفل ماسورة الأحزاب دي بس سؤالي مصر 
  هترسي علي ايه وعلي مين .
  أسسوا أحزاب كما تشاءوا قولوا ماتشاءوا ولكن أرجوكم لاتستخدموا الدين فيما تشاءوا 
    ومن أجل تحقيق ما تشاءوا لأني ببساطة لا أثق في نواياكم ..

هناك 53 تعليقًا:

افروديت يقول...

اذا أردت التعليق
فعليك ألتزام الموضوعية

وقل ماشئت فأنا أسمعك وأستفيد من رأيك


تحياتي للجميع

المصوراتي يقول...

حضرتك عاملة باب في المدونة اسمه لا استخدام الدين

؟؟؟

انا طبعا مش لاقي التزام في الموضوعية خالص يمكن مضايقة بس كان ممكن تطلع منك احلي

دا غير انطبعا البوست اسمه فيه شوبة استهزاء ببلدي ( ملوخية - كاتشب )

انا عاوزها مدنية ذات مرجعية اسلامية

يعني عكس العلمانية اللي طلعت من اوروبا ضد الحكم الكهنوتي الكنائسي الظالم الجاحد

مدونة بكر أحمد. يقول...

لتكن علمانية يا هل مصر حتى لا تقعوا في المحظور وتخسروا ثورتكم الرائعة .

Unknown يقول...

السلام عليكم

هيه مصر كانت حاجة تانية غير انها اسلامية من 1400 سنة من يوم دخول عمرو بن العاص ؟ هل وجدنا كونها اسلامية وحش فعايزين نغير ؟
السؤال الاهم هل هي كانت فعلا اسلامية اي كانت تحكم بشرع الله الذي انزله على نبيه , واول مبادىء هذا الشرع المهدورة العدل واحترام حرية الاسنان في الا يعتقل او يمنع من الخروج من بيته ؟

كم مصري يعرف متى تحولت مصر من محاكم شرعية الى مختلطة الى وضعية ؟

وكم مصري يعرف من جلب القوانين الفرنسية ومتى ولماذا ؟

دولة اكثر من 94 % من سكانها مسلمون فماذا عساها ان تكون ؟


الاسلام هو الاسلام وليس شيئا اخر تحت اي مسمى , فاذا رفضنا هذه المسميات وما جاؤوا به فكم واحد منا استمع الى رغباتهم او ارائهم او حتى تفسيرهم للاسلام حتى نتفق على المجتمع عليه
؟

هل تطبيق الاسلام سيظلم المسيحيين , فاذا كنا نرى في الاسلام ظلما للغير فلماذا ندين به ؟ اما يا ترى ان العدل يجب ان يكون وفق مفهوم الاسلام له ام وفق مفهومنا نحن لما يجب ان يكون عدلا ؟ وهل من العدل ان يحكم مسيحي 70 مليون مسلم فلماذا الاصرار على طرح غير موضوعي لم تتبناه ام الديمقراطيات في العالم بريطانيا , حيث ان ملكتها هي راس الكنيسة البروستنانية .


هوه الاسلام مش كفاية علشان نجيبله حاجة تانية من بره ؟ , وهل يمكن ان ينبت النبات في غير ارضه عنوة .


ماسورة الاحزاب شىء طبيعي للغاية , يقال ان عدد الاحزاب في اليابان بعد الحرب العالمية كان 400 , بقى منهم 12 حاليا منهم حزبين فقط من يتداولون السلطة , فلماذا نخاف من شىء طبيعي ؟



كان السلفيون مثل غيرهم من المصريين يتجنبون السياسة تماما , فهل سنمنع المصريين جميعا من ممارسة السياسة لانهم لم يمارسوها من قبل


سنفترض انهم قالوا انها كانت حراما وكان اجتهاد فقهي وتبين لهم انهم اخطأووا ( ربما يكونوا اخطأووا في دخول المعترك السياسي ) ورجعوا عن خطأهم , هل يدينهم هذا , لماذا نخاف منهم طالما لم يرفعوا السلاح ؟

انت لا تثقين في نواياهم , وهم لا يثقون فيكي . فهل سنظل على عدم حالة الثقة طويلا , وهل سنتقدم خطوة واحدة للامام اذا ما ظل الليبرالي خائف من الاسلامي , والاسلامي يخشى من نوايا الليبرالي , والمسيحي يخشى الجميع , لا سبيل الا بعض حسن الظن بما يكفي لانشاء حوارات فكرية وعقد اجتماعي يكفل للجميع حقوقهم وفق . هنا السؤال
هل نقبل الشرع كمرجعية واذا قبلناه فمن يتحدث باسمه اذا كان لا احد يثق في احد , نعود مرة اخرى الى انه لا سبيل الا الحوار والاستماع واذا صحت الرغبة في الاصلاح فسينصلح الحال .
مش عاجبك حزب الجاهد الاسلامي ( فعلا شكله مش حيبقى حلو طالما الموضوع بالشكل ) طيب البديل ايه نرجعهم المعتقلات تاني ونعذبهم لغاة ما يموتوا
ولا نسيبهم ونقصيهم علشان يرجعوا تاني لرفع السلاح في وجه مجتمع لا يقبل توبتهم ولا يصدقهم ولا يعطيهم الفرصة ؟


اسف للاطالة

mrmr يقول...

عايزنها ديمقراطيه
يعنى حكم الشعب بنفسه واعتقد ده من حكم كل مواطن
لازم يكون نفصل بين الدين والدوله
وفى نفس الوقت الحكم يكون بما يرى الله

غير معرف يقول...

المثل بيقول " الضغط يولد الانفجار " وهؤلاء المصريين معذورين لأنهم لغاية النهارده مش مصدقين انه أصبح فيه حرية بجد .. وعلشان كده تلاقي كل واحد منهم عاوز يمارسها بنفسه وشخصياّ ( عملي ) .
ومن هنا ياأفروديت ستكون الكارثة المروعة عندما يصر كل واحد من هؤلاء كاأحزاب أو جماعات علي رأيه وفلسفته دون الاخر من أجل الحكم اللي بنراه هو المطمح الرئيسي عندهم خلال تحركاتهم الحالية .. وبناءاّ عليه ستكون الواقعة الكبري وليس لوقعتها مثيل .
لهذا باأنصح ولاة الامر الجدد ( هؤلاء المخلصين الشرفاء ) ان يدركوا تماماّ ان التدرج مطلوب عند منح الحرية بعد 66 سنة كبت وضغط لامثيل له في تاريخ وجغرافيا الشعوب التي هي علي وجه الارض سواء القديم منها او الحديث .. وأن يعوا تماماّ أن هذا التدرج امر لا فصال فيه ولا جدال مع اناس نراهم قد فهموا الحرية غلط .. ولهذا تجدهم وهم بيمارسوها غلط .. واللي بالتأكيد ستكون نتائجها في الاخير غلط x غلط .. ساعتها حا اقولك ايه .. هاقولك وبالفم المليان ان هذه الحرية التي انتظرناها طويلاّ وفرحنا بها بعد 25 يناير ستحرق الجميع لأنهم ما فهموها ( صح ) عندما اتاحها لهم القدر بعد طول أنتظار .
أما بخصوص الدين فتحضرني مقولة الشيخ الشعراوي رحمة الله عليه بأننا لا نريد أن نحكم بالدين بل نريد أن نحكم ( ضمه فوق النون ) بالدين ولهذا فشيء طبيعي ان يلجأ للدين هؤلاء المغرضون في البداية من أجل الضحك علي البسطاء بهدف تحقيق مكاسب دنيوية ستكوي بها جباههم في الاخرة والله أعلم .
مع خالص تحياتي للرائعة افروديت

سواح في ملك اللــــــــــــــــــه- يقول...

صباح الفل
ياافروديت
انا عن نفسي بحبها مقلية او مشوية
وفي المشاريب عايزها سكر خفيف
اناشايف ان موضوع الاحزاب ده موضوع
مش وحش خصوصا بعد ماترفع عنه دعم الدولة
يعني الحزب اللي هيبقي ليه جماهيرية
هتلاقيه بيدعم نفسه باعضاءه
والحزب اللي مش هيشتغل هتلاقي الناس تنصرفعنه ويقلبوه ورشة نجارة

مصطفى سيف الدين يقول...

نريدها شعبية ديمقراطية
تحكمنا الاغلبية وتلبي نداء الاقلية
اي حد من حقه انشاء اي حزب مادام هيرسخ في مبادىء حزبه حقوق المواطنة
بس عن نفسي عايز اجرب الملوخية بالكاتشب
اكيد هتبقى احسن :)

تحياتي

عمرو يسرى يقول...

أسسوا أحزاب كما تشاءوا قولوا ماتشاءوا ولكن أرجوكم لاتستخدموا الدين فيما تشاءوا
معاكى جدا فى كلامك
لانى انا كمان لا اثق فى الذين يريدون الحكم باسم الدين

افروديت يقول...

المصوراتي / أهلآ بك

أولآ / ماذا تعني بأنني "عامله باب في المدونة اسمه لا استخدام الدين "

أناكتبت تسمية البوست "لا لأستخدام الدين "

وبالفعل لقدقصدت هذه الجملة ولن أتبرأ من شيء كتبته فلا داعي لأستخدام الدين من قبل أي شخص أيآكان من أجل تحقيق أهداف ومصالح شخصية أوجماعية من يريد أن يعمل بالسياسة ويشارك أهلآ به بس رجاء خلع عباءة الدين قبل المشاركة
الدين أسمي وأرفع من أن يتم أستخدامه لتحقيق أهداف جماعات وتيارات أيآكانت
ولا أجد في هذا شيئآغريبآ أوعجيبآ .

اما بالنسبه اذا كنت لاتري موضوعيه في حديثي فهذا رأيك وأرحب به ..
أما قولك أن هذه بلدك وتجد أستهزاء ملوخية وكاتشب ...فأحب أن أقول لك
هذه ليست بلدك بمفردك دي بلدناكلنا اناوأنت والمسحيي والأخواني والسلفي وأي راجل ماشي في الشارع غلبان ومش عارف حقوقه مصرللجميع ...وأنالم أستهزءبها أبدآ
ولم أذكرأنني كتبت في بعض البوستات ولعنت مصرعزالفساد
تعلم لماذا؟؟؟
لأنهابلدي وأحبهاوأحترمها ..
وأحترم رأيك جدآ بخصوص أنك تريدها مدنيه ذات مرجعية إسلامية ..
رأي صائب أحييك عليه
تحياتي لك

افروديت يقول...

بكر أحمد / أهلآ بيك

بحترم رأيك طبعآ

ولكن مصر لم ولن تصبح دولة علمانية أبدآ

وهذا رأيي أيضآ

لاأظن أن هذا سيحدث ولا أوءيده ابدآ
الله ينصركم علي الطاغية اللي عندكم يابكر ويعينكم عليه

تحياتي لك علي مرورك ورأيك الذي اقدره وأحترمه

افروديت يقول...

واحد من الناس /

مصر إسلامية وستظل بأذن الله ... ولم نجد أن هذا سيئآ ولكن هناك من يريدون تغيرها وأنت تعلم هذا .

سؤالك الثاني / لم تحكم مصر بالشرع وذلك لأن من كانوا يحكموها مجموعة لصوص ومستفيدين فكيف يطبقون هؤلاء أي شرع


انا لاأعترض أبدآ علي تطبيق الشرع ولكن كل ما أرفضه هو أستخدام الدين لتحقيق أهداف ومصالح شخصية غيرمعلومة

أخي الفاضل الأسلام لايظلم أحدآ الأسلام يحترم الجميع بغض النظر عن ديانتهم واتجاهتهم الأسلام يحتم عليناأحترام الأخر وحسن معاملته ومراعاة حقوقه

أما بخصوص أن يأتي حاكم من ديانة أخري كالمسيحية مثلآ فهذا لن نقبله أونرفضه نحن وسأقول لك لماذا ؟؟
لأنه في حال عمل أنتخابات نزيهة وشفافة سينجح بالتأكيد رجل مسلم لأن الأغلبية العظمي مسلمين فهذه النقطة غيرمطروحة سوي في نطاق ضيق وغيرجدي .

أمابخصوص ماطرحته عن السلفيين فهذا الأمر غريب بالفعل ...وسأقول لماذا

هناك ثوابت للحرام والحلال لايختلف عليه أثنان كيف تقول لي مثلآ أن الترشح للأنتخابات حرام وعمل حزب سياسي حرام
وتأتي اليوم وبعدالثورة وعندماوجدت أرض خصبة لممارسة ماكنت تحرمه وأجدك تقول أن هذا حلالآ

الحلال وبين والحرام بين ياأخي ...
ولايعتمد علي أجتهادات فرديه أم أن الثورة هي التي أحلت الحرام

أنا أول من ينادي بأن الشريعة الأسلامية تكون مرجعية الدولة ولكن أنا أرفض المتلونين والمتحوليين والمستجدين الذين يأخذون من الدين مايشاءون ويتركون مالايريدون
أرفض كل من قال أن الثورة مجرد حركة وستنتهي ولن نشارك في هذاالهراء وعاد بعدذلك لينسب الفضل لنفسه
لا داعي لأن أحدثك عن ماقامت به بعض التيارات في الأستفتاء وقدرأيت هذا بنفسي وحدث معي ممن لايعرفون هويتي ..
وقدقلت في أخركلامي يقولوامايشاءوا
ويأسسوا احزاب كمايشاءوا ولكن لاينبغي أستخدام الدين
من يريدالمنصب سواء مسلم اومسيحي فعليه بالأجتهاد في برنامج جيدتقديم خدمات للناس ولكن دون الدخول في سكة الدين

أماجماعة الجهاد الأسلامي فمن قال أنهم لايعجبوني فأنا لا أعرفهم ولا أوءيد أوأعارض

وأخيرآ أحترم كل ماجاء في حديثك

تحياتي لك

افروديت يقول...

mrmr/ أهلآ بيكي يامرمورتي

أكيد يامرمر لازم يكون في ديمقراطية
دا هدفناكلناواظن مش هيختلف عليه أثنين

بحترم رأيك طبعآ بخصوص الفصل بين الدين والدولة

وأقدرجدآ ماقلتي عن أن الحكم بمايري ويرضي الله لن هذا الرأي صائب

تحياتي ليكي يامرمر كتير

افروديت يقول...

أعتذر بشده عن عدم ردي علي باقي تعليقاتكم وأراءكم الأن لدي عمل ومضطره أنزل ولكني أعد بالرد عليهاقريبآ

تحياتي للجميع

ツSmiLeY AnGeLツ يقول...

اصلا لو كانوا دارسين الدين والشريعة الاسلامية كويس اوي
ماكانوا اختلفوا او علموا احزاب
وكانوا استخدموه بشي الطيب ويكون لمصلحة الوطن والشعب مش لاجل مصلحتهم هم
تقبلي مروري ^_^

eng_semsem يقول...

نريدها اسلاميه تسير على شرع الله وهو يحفظ المسلمين ويحمي حقوق غير المسلمين
اما عن حكاية الاحزاب ايه المشكله ان يبقى في مية حزب وايه المشكله انه يبقى في مية مرشح رئاسي وايه المشكله لما الوحش يظهر ده هيخلينا نعرف انه وحش ومهما كترت الاحزاب مش هتغير النتيجه ان الافضل واللي الاغلبيه هتختاره هيكون فائز اي كان سلفي اخواني علماني مسلم مسيحي بدام انتخابات نزيهه وده اختيار الاغلبيه حتى لو كان ضد رايي لازم هحترمه

Tamer Nabil Moussa يقول...

يمكن بعد 25 بقى فى حرية واختفى النظام الذى كان يمنع كل صوت يقول ما لايحب اما الان الوضوع اختلف

يارب يكون مليون حزب ومليون فكر المهم يكون فى حرية

واللى هيحكم الشعب هو اللى يختار ويقول كلمتة


تسلمى افروديت

مع خالص تحياتى

مدونة رحلة حياه يقول...

أفروديت
ازيك شو اخبارك
من حق كل واحد يقول اللى عنده بموضوعية
ومن حقه علينا اننا نسمعه وطبعا حقنا عليه يسمعنا ويحترم رأينا زى ما بنحترمه
خلى الكل يتكلم ويعمل احزاب بس نفسى فى حاجة واحدة ان كل واحد يتكلم فى اللى بيفهم فيه ساعتها اكيد حالنا هيتبدل كتير بس مشكلتنا اننا بنحب نفتى فى كل شئ
طرحك مميز دومتى بود

غير معرف يقول...

السلام عليكم ورحمه الله وبركاته
كلفنى الاستاذ بيرم المصرى بارسال هذه التحيه لجميع الاصدقاء وذلك لتعذر قيامه بها بشخصه
(اجمل التهانى واطيب الامانى للجميع بمناسبه عيد القيامه المجيد وشم النسيم)

ورد الغصون...

نيابه عن بيرم المصرى
صاحب مدونه كرباج سودانى

محمود المصرى يقول...

صديقتى اللدودة افروديت واختى الحبيبة
اْولاَ لازم تعرفى ان الموجودين دول مش سالفين لاْن ببساطة كلنا سلف للنبى عليه افضل الصلاة والسلام وصحابته والمذاهب الاْربعه عليهم جميعا رضوان الله دول ببساطة وهابين وبيقولوا انهم مجددين السنة والنبى برىْ منهم
ثانياَ الاْسلام هو الديمقراطية التى تبحثوا عنها هو دين الوسطية والمسلم هو من سلم الناس من لسانه ويده ودورى على اْى مساْلة سياسية عندك فيها مشكلة وهتلاقى ان الاْسلام وقواعده وضعوا الحل لها من اْلاف السنين
وشوفى مثلاَ مساْلة اْطفال الشوارع وهى مساْلة سياسية قبل ان تكون اْنسانية لاْن كلنا بنحمل الدولة عبئهم زى ميكون هما الى خلفوهم ورموهم فى الشارع الاْسلام وضع كفالة اليتيم واذا كل واحد مبسوط فى عيشته خد طفل وكفلة فى بيته وعلمه مكنتيش شوفتى اى طفل فى الشوارع ولا حتى الملاجىْ ده شىْ مش صحيح لاْن نص اطفال الشوارع منها
ثالثاَ الاْخوة العلمانين بيقولوا نفصل الدين عن الدولة طب هو يعنى اية دولة ومن اين نشرع ونضع قوانين اليس من الاسلام واحنا اصلاَ اتخلقنا لية مش عشان العبادة وربنا قال وما خلقت الاْنس والجن الا ليعبدون
رابعاَ متنسيش تشوفى موضوعى الجديد لاْنى اتجننت فى عقلى ورجعت اكتب تانى
واسف طولت ىعليكى

Unknown يقول...

بسم الله الرحمن الرحيم
" وما خلقت الجن والإنس إلا ليعبدون "
صدق الله العظيم

افروديت يقول...

al-sharkawi / أهلآ بيك

أنا متفقه جدآ مع وجهة نظرك لآنها صائبة

وأقرب مايكون لمانحن فيه ونعانيه الأن

أتمني أن لايضطرناالأمر للصدام ولتخبط مع أحد فالأغلبيه العظمي منا مسلمين والمسيحين في هذا البلد سواء يريدون حرية وديمقراطية ولكني أريدها مقننه منا نحن ليتنانفعل هذا بأنفسنا ولاننتظرأحدآ


تحياتي لك

افروديت يقول...

سواح في ملك الله / ههههههههه

حلوة ورشه نجارة دي بس تفتكر انه ينفع اصلا أي ناس بيقولواعندنافكر ورأي و.......

يقلبوا لنجارة ويتخلواعن كل ده


اصدك لازم يعملوا كويس وده بنتمناه كلنا أما نشوف ياسواح ربنايسهل


تحياتي ليك

افروديت يقول...

مصطفي سيف/

حلو الرأي المحايد ده يادكتور بس في ناس كتير هتختلف معاك وده أختلاف صحي وطبيعي


بس مبدئيآ كلامك كويس وأنا بأيدك

ومتفقه معاك

تحياتي لك

افروديت يقول...

عمرو يسري / اهلا بيك

كويس أن في حاجة في البوست عجبت حد من القراء دايسعدني طبعآ


تحياتي ليك

افروديت يقول...

خواطري مع الحياة / اخبارك يارشا وحشاني بجد

كلامك منطقي ومعقول جدآ وياريت اللي كان هدفه دعوة يركز فيهاومش يدخل في السياسه غيرأمايدرس الموقف كله حتي لايخطيء في حق أحد


تحياتي لكي وأجاركم الله من الفرعون الأخر

افروديت يقول...

eng_semsem /

ومين قال أني رافضه

وصلب الموضوع هيتلخص في أن كانت الأنتخابات نزيهة أو لأ

والأهم عدم سيطرة أي تيار أو قوي معينه مثلما حدث في الأستفتاء فاهمني

تحياتي ليك ياأسامه

افروديت يقول...

تامر نبيل موسي /

أتمني أن ده يحصل بجد ياتامر و25 تغيير ومش يكون في أي هفوة من اللي كان حاصل


تحياتي ليك

افروديت يقول...

مدونة رحلة حياة/ كيفك خيي

وكيفه معاذ

اوك يامحمد بس زي مابتقول أن بلاش حد يفتي

عايزة اقولك ان اللي بيفتوااليومين دول كتروا أوي وقلبينهارأسآ علي عقب


ربنايستر عليكي يامصر

تحياتي يامحمد

افروديت يقول...

الي الغير معرف / أشكرك أولآ

ولكن هل من الممكن تطمنيني علي استاذ بيرم من فضلك

ولماذالم يستطع الرد بنفسه هل هوبخير


ربنايطمناعليه الشاعرالمحترم جدآ

وميرسي علي مرورك ورسالتك

افروديت يقول...

محمود المصري / عودآ حميدآ يامحمود

أخبارك ايه التدوين محدش يقدر يهجره ابدآ

شوف مش هقدرأحكم علي أن كل السلفيين اللي بيدعوا كده أنهم مش سلفيين لأن أكيد أوي في منهم مخلصين وبيسيرواعلي منهج رسول الله فعلآ

ربنايسترها ع الكل وعلي مصر


أماموضوع أطفال الشوارع ده فاماما سوزان كانت واكله الفلوس بدل ماتلمهم من الشارع وترحم مصرمن انفجار اسمه اطفال الشوارع

ربنايرحم الكل برحمته

تحياتي ليك يامحمود

افروديت يقول...

محمود المصري / عودآ حميدآ يامحمود

أخبارك ايه التدوين محدش يقدر يهجره ابدآ

شوف مش هقدرأحكم علي أن كل السلفيين اللي بيدعوا كده أنهم مش سلفيين لأن أكيد أوي في منهم مخلصين وبيسيرواعلي منهج رسول الله فعلآ

ربنايسترها ع الكل وعلي مصر


أماموضوع أطفال الشوارع ده فاماما سوزان كانت واكله الفلوس بدل ماتلمهم من الشارع وترحم مصرمن انفجار اسمه اطفال الشوارع

ربنايرحم الكل برحمته

تحياتي ليك يامحمود

افروديت يقول...

محمد الجرايحي /

أهلآ بيك

قلت خيرمايمكن أن يقال

تحياتي لك

الاحلام يقول...

الانسان البسيط بداء يحتار فيوجد طوائف تنادى باسم الدين والاسلام وهو لا يعرف من فيهم الصح ومن فيهم الخطاء اتمنى ان نكون بلد اسلاميه قائمه على الديمقراطيه ولا ننرحم ابدا من الحريه الى اعطانا الله اياها
سعدت بوجودى هنا تقبلى تحياتى الاحـــــــــــلام

Beram ElMasry يقول...

ابنتي الحبيبة الغالية افروديت ربة العشق والجمال
لصدق مودتي اني عليك عاتب فمثلك دعم لي ولقلمي وطاقة نور فيما اكتب وانقطاعك عني ولو مرة يصيب قلمي بحزن.... فليتك تتفضلي بالمداومة علي الزيارة والتعليق في مدونتي
واني اعتذر عن عجزي في التهنئة ولكن طمعي في كرم الاخلاق جعلني انيب الاخت الكريمة ورد الغصون بالقيام بدلا عني بذلك
تحية وسلام ولاسلام مع بني اسرائيا

Beram ElMasry يقول...

ابنتي الحبيبة
بعد قراءه موضوعك في مدونتك:
صدقيني بعد ان تهدأ العاصفة ستستقر الاوضاع ويبقي الخير محضا وصدق الله العظيم اذ يقول "فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الْأَرْضِ"

الاحلام يقول...

دائما نحتاج لابداعاتك فهى التى تمتعنا وتسعدنا
كل سنه وانتى بكل خير وسعاده ويارب تحققى كل ما تتمنيه دمتى بكل خير وسعاده تقبلى تحياتى الاحــــلام

richardCatheart يقول...

ازيك يا سمسمه انت فين كلنا قلقنيك عليكى طمنينا يا سما من فضلك
يارب تكونى بالف خير وكل الاهل يارب

Haytham Alsayes يقول...

انا عن نفسي عاوزة دولة مدنية ودولة قانون بمرجعية اسلامية ودة الاصل اساسا في الشعب المصري مع الاحترام الكامل في الحقوق والواجبات للمسحيين لانهم مواطنون لهم ماعلي المسلمين وعليهم ماعليهم

بالنسبة لاستغلال الدين في التصويت فارفضه استغلال الدين كشعار سياسي او اداة سياسية دة مرفوض تماما


تحياتي

الشوكة الناعمة يقول...

حاليا معنديش اى ملامح عن الدوله مش عارفه فى ظل كل التوتر والبلبله دى ايه ممكن يكون الاصلح
انما انا دايما من وسط ده كله مقتنعه بكلمه واحده عامله بالنسبه لى كده زى القاعده بتاعه لاص الا الصحيح
دايما متأكده ومقتنعه ان الدين ما ينفعش يتسيس ولا السياسه تنفع تدين
دى وجهه نظرى

الاحلام يقول...

نحتاج الى ابداعاتك حقا والى تعليقاتك فاننا نفتقدك كثيرا دمتى دائما بخير
تقبلى تحياتى الاحــلام

كريمة سندي يقول...

الدولة لا تحتاج لمسمى بقدر ما تحتاج لصحوة حقيقية تقبلي مروري

Tamer Nabil Moussa يقول...

ازيك فروديت


اخر بوست ليا مجرد قصة او حدوتة من دماغى وليس لها صلة بيا


انا عشان اللخبطة دى كتبت تنوية اخر البوست


مع خالص تحياتى

ابراهيم رزق يقول...

انا اريدها مصرية

حضن ام يتسع الجميع و يرحب بالجميع اما الاسماء فليس لها محل من الاعراب

خالص تحياتى

افروديت يقول...

الأحلام/

أهلا بيك

أنا برحب برأيك طبعآ وبحترمه أكيد

ونتمني ذلك وكل مافيه الخيرلمصر

تحياتي لك

افروديت يقول...

BERAM ELMASREY/ أهلا بك والدي العزيز

فرحت جدآ لأنك بخير وبصحة جيدة
ومرحبآ بأصدقائك في أي وقت

لا أستطيع أن اتأخر أبدآ عن مدونتك وقراءة أرقي وأحلي القصائد التي لها مذاق خاص

وأتمني من الله تستقر الأمور وتهدأ لمافيه الخيروصالح مصر
ونحقق كل مانريده حتي نشعرأننا وصلنالكل ماكنانسعي له لمافيه الخيرلمصر

خالص تحياتي وتقديري وأحترامي لك
وتسعدني جدآ زيارتك ويشرفني هذا

افروديت يقول...

الأحلام/ أشكرك جدآ يا أستاذي الفاضل


هذاكثيرعلي حقآ وأعدك أنني سأءتي يشرفني ويسعدني زيارتي لمدونتك الهادفة


تحياتي لك

افروديت يقول...

RICHARD CATHEART/ أطمني يامارو انابخيرياقلبي وحشتيني

افروديت يقول...

HAYTHAM ELSAYES/أهلآ بيك ياهيثم

أنا أميل الي هذا الرأي حقآ وأحترمه


تحياتي لك

افروديت يقول...

الشوكة الناعمة / أهلآ بيكي

عجبتني جدآ وجهة نظرك في موضوع لا للخلط


هذا ماأتمناه أن لايحدث الخلط بين الدين والسياسه هذه الخلطة الجهنمية أراها تنتج دمارآ للكل


تحياتي لكي

افروديت يقول...

الأحلام / ميرسي جدآ يافندم ربنايخليك بجد


وجايه فورآ


تحياتي لك

افروديت يقول...

كريمة سندي/ نعم نحتاج لصحوة أخري بشرط أن نكون مجمعين علي شيء واحد

ولا يبكي كل واحد علي ليلاه


تحياتي لكي

افروديت يقول...

تامر نبيل / بخير ياتامر أخبارك.... سوري ياتامر

مش عارفه ليه حسيتها حقيقية


ولكني سأعود لهامرة أخري

تحياتي لك